வரதட்சணை கொடுமையால் இளம்பெண் தீக்குளித்து தற்கொலை

சென்னை கே.கே.நகர் பகுதியில் வரதட்சணை கொடுமையால் இளம்பெண் தீக்குளித்து தற்கொலை செய்துகொண்ட அதிர்ச்சிகரமான சம்பவம் நிகழ்ந்துள்ளது.

திருவாரூர் மாவட்டம் விளமல் பகுதியை சேர்ந்த தம்பதி துரை-சாவித்திரி. இவர்களுக்கு 2 மகள்கள் உள்ளனர். இதில் மூத்த மகள் கார்த்திகா, கடந்த 2015 ஆம் ஆண்டு விமல் ராஜ் என்பவரை காதல் திருமணம் செய்து, சென்னை கேகே நகர் 5-வது அவென்யூவில் வசித்து வந்தார்.

திருமணம் நடைபெறுவதற்கு முன்பே விமல் ராஜின் பெற்றோர் வரதட்சணையாக 80 சவரன் நகை மற்றும் கார் கேட்டு வற்புறுத்தி உள்ளனர். ஆனால் கார்திகாவின் பெற்றோர் 55 சவரன் நகை, ஒரு கிலோ வெள்ளி மற்றும் ஒரு லட்சம் ரூபாய் ரொக்கப் பணமும் சீர்வரிசையாக கொடுத்துள்ளனர். கார்த்திகாவின் கணவர் சேலத்தில் உள்ள தனியார் நிறுவனத்தில் பணிபுரிந்து வருவதால், வாரத்தில் இரண்டு நாட்கள் மட்டுமே சென்னை வந்து செல்வார்.

இதை தனக்கு சாதகமாக பயன்படுத்தி கொண்ட விமல் ராஜின் பெற்றோர், கார் வாங்கி தருமாறு அடிக்கடி கார்த்திகாவை தொந்தரவு செய்துள்ளனர். மேலும் நாங்கள் 80 சவரன் நகை கேட்டோம் ஆனால் உன்னுடைய பெற்றோர் 50 சவரன் நகை போட்டு உள்ளார் என்று குறை கூறிய வந்துள்ளனர்.

இதனால் மனமுடைந்த கார்த்திகா நேற்று முன்தினம் பெட்ரோல் ஊற்றி தீக்குளித்து தற்கொலை செய்துள்ளார். இதுகுறித்து தகவலறிந்த போலீசார், சம்பவ இடத்துக்கு சென்று, கார்த்திகாவின் உடலை மீட்டு பிரேத பரிசோதனை செய்வதற்காக ஓமந்தூரார் அரசு மருத்துவமனைக்கு கொண்டு சென்றனர்.

இதுகுறித்து கார்த்திகாவின் பெற்றோருக்கு தகவல் தெரிவிக்கப்பட்டு அவர்களும் உடனடியாக சென்னை வந்தனர். இந்த வழக்கை ஆர்டிஓ விசாரித்து வருவதால், காவல்துறையினர் புகார்களை வாங்கவில்லை. இந்நிலையில் கார்த்திகா இறப்பிற்கு காரணமானவர்களை உடனடியாக கைது செய்ய வேண்டும் எனவும், வரதட்சணை காரணமாக கணவன் குடும்பத்தினரே கார்த்திகாவை தீயிட்டு கொளுத்தி இருக்கலாம் என அவரது தாய் சாவித்திரி குற்றம்சாட்டியுள்ளார். இந்த சம்பவம் அப்பகுதி மக்களிடையே அதிர்ச்சியை ஏற்படுத்தியுள்ளது.

Website – www.universaltamil.com

Facebook – www.facebook.com/universaltamil

Twitter – www.twitter.com/Universalthamil

Instagram – www.instagram.com/universaltamil

Contact us – [email protected]